Peskiza Atividade Emprezarial sai hanesan Sasukat Xave realizasaun Indústria iha Timor-Leste
Dili, 23 Marsu 2026 – Prezidente Institutu Nasionál Estatístika Timor-Leste, Institutu Públiku (INETL, I.P), Sr. Elias dos Santos Ferreira, Ministériu Finansas, ofisiálmente halo abertura ba formasaun ba Peskiza Atividade Emprezariál (PAE) iha INETL, I.P., iha Salaun Konferénsia REHA, Caicoli, Dilí.
Iha oportunidade dahuluk, Diretora Interina Diresaun Estatístika Ekonómika, Sra. Nani Rolanda Paula C. Costa, aprezenta relatóriu tékniku badak kona-ba Peskiza Atividade Emprezariál. Nia nota katak peskiza ne’e hala’o uluk iha tinan 2010 no sai hanesan atividade rutina anuál. Nia hateten liután katak kontrolu kualidade hetan apoiu hosi Gabinete Estatístika Austrália nian (ABS).
Nia mós esplika katak objetivu hosi Peskiza Atividade Emprezariál ne’e atu fornese sasukat ida kona-ba dezempeñu indústria Timor-Leste nian. Dadus ne’ebé halibur sei uza ba kompilasaun agregadu konta nasionál Timor-Leste nian. Rezultadu sira sei apoia analista sira hodi levanta kestaun polítika relevante sira no monitoriza no avalia mudansa atuál sira iha estrutura no dezempeñu emprezariál sira hotu iha Timor-Leste.
Ba peskiza 2025, enumeradór na’in 36, supervizór na’in 9, no kondutór na’in 9 maka rekruta ona. Entre enumeradór na’in 36, feto na’in 17 no mane na’in 19, halo totál pesoál peskiza na’in 54, aleinde tékniku INETL na’in 7. Rekrutamentu ba enumeradór sira bazeia ba kualifikasaun akadémika no fó prioridade ba kandidatu sira ne’ebé iha esperiénsia serbisu iha peskiza iha INETL, I.P. Nia relata katak, hosi enumeradór no supervizór na’in 45, 71.1% iha esperiénsia serbisu nian, enkuantu 29% laiha esperiénsia anteriór iha serbisu peskiza nian.
Peskiza ne’e organiza iha ekipa, ho ekipa ida-idak kobre munisípiu rua, inklui Dili. Ekipa ida-idak kompostu husi membru funsionáriu na’in 6: enumeradór na’in 4, supervizór na’in 1, no kondutór na’in 1.
Amostra totál ba Peskiza Atividade Emprezariál nian maka 3,429 hosi totál populasaun 7,606. Amostra munisípiu nian hamutuk 1,291, no amostra Dili nian hamutuk 2,438, inklui top 300.
Iha diskursu, Prezidente INETL, I.P., Sr Elias dos Santos Ferreira informa ba partisipante sira katak formasaun ba supervizór no enumeradór sira sei hala’o durante semana ida iha Salaun INETL. Nia mós subliña katak supervizór no enumeradór sira tenke respeita oras ne’ebé marka ona no tuir didi’ak formasaun ne’ebé fó husi formadór timoroan sira ne’ebé kualifikadu iha INETL. Nia husu ba partisipante sira katak, karik iha pontu ruma mak la klaru durante formasaun, tenke husu pergunta atu nune’e tékniku sira bele esplika no esklarese liután, hodi garante produsaun dadus ho kualidade aas ba INETL no Ministériu Finansas.
