INETL, I.P., Asina Akordu ho Ministériu Komérsiu no Indústria iha área Estatístika no Peskiza.

Díli, 11 Junu 2024 – Presidente Instituto Nacional Estatística Timor-Leste, Instituto Públiku, Ministério Finansas, Sr. Presidente Elias dos Santos Ferreira ho Diretór Jerál Servisus Korporativos husi Ministériu Komérsiu no Indústria, Sr. Leonardo Guterres de Carvalho, asina ona akordu kooperasaun servisu iha área Estatístika no Peskiza ninian. Seremonia asina akordo ne’e hala’o iha fatin Salaun Ministériu Comércio no Indústria (MCI) iha Fomento Dili.

Kooperasaun serbisu iha área estatístika no peskiza ne’e nia objetivu no ámbitu mak atu artikula forma sira konkreta ba kooperasaun no koordenasaun serbisu entre parte-rua iha ámbitu formasaun ka treinamentu ba funsionariu sira Ministériu Comércio no Indústria (MCI) nian relasiona ho jestaun ba dadus estatístika iha área Comércio no Indústria ba nesesidade instituisaun Estadu nian no realiza peskiza informál ba atividade Comércio no Indústria iha Timor-Leste.

Iha seremonia asina akordo kooperasaun ne’e Diretór Jerál Servisus Korporativos, Sr. Leandro sublina katak, tempu ida asina ne’e, tempu oportunu tebes atu ita trasa hodi bele estabelese, kooperasaun ne’ebé di’ak liután entre Ministériu Comércio no Indústria ho INETL, I.P. Iha mós dala wain, MCI ne’e nia kontribuisaun boot tebe-tebes ba iha dezenvolvimentu ekonomiku, tenik sr. Carvalho.

“Diretor Jerál MCI ne’e afirma tan katak, dala barak atu kria polítika liu-liu iha seitores Comércio no Indústria ita persiza dadus, dadus ida ne’ebé kredibel para oinsa, ita nia nai-ulun ka desizór sira bele foti desizaun ruma, liu-liu atu foti polítika baseia ba evidensia ruma, ne’ebé relevante ho situasaun real.

Presidente INETL, I.P., Sr. Elias dos Santos Ferrera, hato’o agradese wain ba MCI ho INETL kontinua nafatin mantein kooperasaun serbisu ida di’ak iha área Estatístika no peskiza. Iha Oitavo governo ita asina tiha ona akordu tekniko ba dala-uluk iha duni fatin ida ne’e, altura ne’ebá entre Sua Excelencia Ministru MTCI, José Lucas do Carmo da Silva ho Ministru Finansas, Rui Augusto Gomes no nonu governo agora hanesan Segundo faze asina akordu serbisu tékniku entre Presidente INETL, I.P ho Diretór Jeral Servisus Korporativos MCI, hodi haforsa liutan serbisu tékniku nian.

Iha semana hirak liu ba, INETL hetan pedidu husi MCI liu husi Diresaun Nasionál Peskiza Estatística husi turismo no ambiente husu tékniku INETL fó formasaun ba staff sira MCI nian, no altura ne’eba realiza duni ho durasaun semana ida, Sr. Ferreira akresenta.