INETL, IP fó sai rezultado relatóriu Índise Presu Konsumedór ba fulan Novembru tinan 2023

Dili 19 fulan dezembru 2023, Presidente, Instituto Nacional de Estatística de Timor-Leste, Sr. Elias dos Santos Ferreira hamutuk ho delegasaun BCTL, ho lina ministériu no mós instituisaun governu relevante sira fó sai rezultado Índise Presu Konsumedór ba fulan Novembru 2023 nian no eventu referre hala’o iha salaun konferensia REHA-INETL, Caicoli, Dili.

Durante sorumutu ne’e apresentadora husi IPK ne’e relata katak, mudansa persentajen Índise Presu Konsumedór (IPK) Grupu Hotu mensál sa’e (+0.2%) ba fulan-Novembro, 2023, kompara ba fulan-Outubro, 2023 sa’e mos (+0.2%). Mudansa presu grupu hotu (+0.2%) tanbá hetan kontribuisaun husi grupu Hahan no Bebidas La’os Alkoholika (+0.5%), Transporte (+0.1%) no Uma (+0.1%). Grupu Alkohol no Tabako (-0.6%), no Hatais no Sapatu (-0.1%) sai hanesan mudansa kontrariu ba inflasaun grupu hotu. Grupu Hahan no Bebidas Laos Alkoholika sa’e (+0.5%) tamba hetan impaktu maioria husi sub grupu Modo Tahan (+2.3%), Foos (+1.0%), Susubeen, Keiju no Manutolun (+0.5%), Kafe, Xa, no Kokoa (+0.4%) no Ikan no Hahan Tasi (+0.2%). Sub grupu Mina no Bokur (-2.2%), Masin Midar, Marmelada, Banibeen, Cokolate, no Hahan Midar (-1.0%) no Naan (-0.4%) sai hanesan mudansa kontrariu ba inflasaun grupu hahan no bebidas laos alkoholika.

Mudansa persentajen IPK anuál sa’e (+9.0%) kompara entre fulan-novembro, tinan-2023 ho fulan-novembro, tinan-2022, hetan kontribuisaun husi grupo Hahán no Bebidas la’ós Alkólika (+11.8%), Alkohol no Tabako (+30.0%), Edukasaun (+7.0%), Hatais no Sapatu (+1.7%), Komunikasaun (+0.7%) no Uma (+0.1%) ba anuál Novembro 2023. Grupu Transporte (-2.6%), Rekreasaun no Kultura (-0.7%), no Ekipamentu no Manutensaun Mobilariu Uma Laran (-3.2%) sai hanesan mudansa kontrariu ba inflasaun grupu hotu ba anual Novembro 2023.