Banku Dezenvolvimentu Aziátiku liu husi Formadores Nain-tolu mai fornese Kapasitasaun ba Funsionário INETL-I.P

Dili, 31 Jullu 2023–Prezidente Institutu Nasionál Estatístika Timor-Leste, Institutu Públiku (INETL, I.P) Sr. Elias dos Santos Ferreira hamutuk ho Banku Dezenvolvimentu Aziátiku (ADB) Manila, nia delegasaun ne’ebé Chefia husi Sra. Arushi Gupta ho nia kolegas nain rua seluk ho naran Ana Francesca Rosales no Sarah Mae A. Manuela, ohin dader ofisialmente loke treinamentu ida hodi fó kapasitasaun kona-bá koinesimentu no supporta assistencia Téknika liu-liu ba Statistika Ekonómia. Treinamentu ne’e sei partisipa husi funsionário INETL hamutuk nain 20 no treinamentu referre sei dura ba semana rua hahú husi 31 Jullu to’o fali dia 11 Agostu 2023. Fatin lansamentu ba treinamentu ne’e iha Salaun Konferencia REHA INETL-I.P Cai-coli Dili.

“Objetivu husi formasaun ne’e mak atu dezenvolve fonte estatístika foun no haklean liu tan koinesimentu balun ba INETL nia staff sira, iha fontes dadus foun refere inkluindu teknolojia ne’ebé utiliza iha implementasaun hodi halo kompilasaun ba Supply and Use Tables (SUT)” ho presu esistente ba Timor-Leste no presu ka folin implementa iha tinan ne’e.

Prezidente INETL-I.P, Sr. Ferreira informa katak, molok formasaun ne’e hahú altura ne’eba iha ona diskusaun entre Institutu Nasionál Estatístika Timor-Leste, Institutu Públiku (INETL, I.P)  ho Banku Dezenvolvimentu Aziátiku (ADB) Manila, iha tinan rua liu ba liu husi aparellu enkontru Zoom, maibé tanba surtu Covid-19 nune’e la to’o ba realiza no agora mak realiza dadaun ne’e.

Iha okaziaun ne’e Sr. Gupta salienta katak, sei iha mós sesaun diskusaun durante atividade referre sei inklui mós hasoru malu ho instituisaun relevantes hanesan Banku Central Timor-Leste, Ministériu Turizmu, Autoridade Nasionál Petróleu no Minerál, no Ministériu Saúde. Iha hanoin ida katak atu haree mós dadus ne’ebé INETL-I.P halo kompilasaun ligadu ho produsaun estatístika ekonómia hodi sobresai ba kontas nasionál anuálmente.

Sra. Gupta enfaze mós katak “Asesu dadus ba estatístika ekonómia ne’ebé kompiladu hosi INETL ne’ebé iha konkordánsia ho enkuadramentu ka padraun internasionál”.

Chefe delegasaun no formadora, Arushi Gupta haksolok tebe-tebes tanba bele mai vizita nasaun foun Timor-Leste hodi hafahe koinesimentu balun ne’ebé sira hatene ba fali staff sira INETL ne’ebé planu ne’e hahú kedas tiha ona iha tinan 2021. Iha tempu hanesan chefi formadora ne’e rasik hakarak extende ninia agradese wain tebes ba Institutu Nasionál Estatístika Timor-Leste ne’ebé simu ona sira nia pedidu no aseitasaun hodi organiza hamutuk formasaun refere, no ikus mai sei benefisia mós ba staff sira husi INETL liu-liu Depatamentu Statistik Ekonómia, formadora hatutan katak, sira mós sei mai superviziona fali dadus ne’ebé existe no sei aprende mós informasaun balun ne’ebé kompila tiha ona husi INETL.

Presidente INETL-I.P ho Chefi delegasaun ADB ne’e share ka hafahe informasaun katak, Banku Dezenvolvimentu Aziátiku (ADB) sei serbisu hamutuk ho Australian Bureau of Statistics (ABS) hodi fornese formasaun ka treinamentu klean-liu tan ba Staff  sira INETL-I.P tuir nesesidade ne’ebé estadu Timor-Leste presiza.

Iha eventu lansamentu ne’e atende mós husi Inspektur ba Fiskal Uniku INETL nian Sr. Ernesto da Conceição Silva, Assesor Internasional ba Kontas Nasionál, Diretores INETL, Chefias husi INETL no funsionários sira hotu.