Ministra Finansas loke treinamentu kona-ba Peskiza Sasukat Padraun Moris Timor-Leste 2024 ba dahaat nian hamutuk ho Representante Banku Mundial ho mós Presidente INETL, I.P

Dili, 18 Marsu 2024 – Ministra das Finansas, Santina José F. Viegas Cardoso ohin ofisialmente halo abertura ba Peskiza Sasukat Padraun Moris Timor-Leste ba daha’at nian ne’e, ne’ebé akompaina husi Prezidente Instituto Nacional Estatístika Timor-Leste, Instituto Públiku (INETL, I.P), Elias dos Santos Ferreira, no Reprezentante Banku Mundiál iha Timor-Leste, Bernard Harborne. Eventu refere iha salaun Diresaun Jerál Jesatun Patrimóniu Estadu, Balide.

Iha abertura ne’e Sra. Cardoso informa katak, “Peskiza sasukat padraun moris Timor-Leste tinan 2024, nu’udar peskiza ba daha’at hafoin ita restora independencia, peskiza dahuluk hala’o iha tinan 2001, daruak iha tinan 2007 no datolu iha tinan 2014. Iha ne’e hakarak fó agradese ba INETL ne’ebé ho esforsu tomak serbisu hamutuk ho Banku Mundiál husi tinan 2022 ba preparasaun, hodi diskute kuestionáriu ho entidade hotu, hala’o diskusaun klean ho ekipa sira Banku Mundiál Jakarta, Roma no Washington DC hodi finaliza kuestionáriu atu uza ba peskiza ne’e.”

Treinamentu ka formasaun ne’e planu atu hala’o iha tinan 2023, maibé tanba iha tempu ne’eba iha akontese mudansa governasaun, hodi nune’e foin bele implementa iha tinan 2024. Tenik Ministra das Finansas.

Instituto Nacional Estatístika Timor-Leste-INETL hala’o tiha ona pilotu ba datolu hodi koko ka teste kuestionáriu no teste ba aparelu ne’ebé sei uza ba peskiza ne’e mak hanesan Computer Assisted Personal Interview CAPI/Android.

Formasaun ka treinamentu ne’e importante tebe-tebes hodi kompriende loloos no didi’ak kona-bá kuestionáriu ne’ebé sei utiliza iha peskiza. Ha’u fiar metin katak partesipante sira barak mak iha ona esperiénsia serbisu hamutuk ho INETL iha tempu liu ba ho peskizas bar-barak no iha liga mos ho sensu agrícola, peskiza forsa traballu no peskiza sira seluk ne’ebé organiza hosi INETL no ikus liu maka iha sensu Populasaun no Uma-kain iha tinan 2022 liu-bá,” Ministra Santina salienta.

Iha IX governu konstitusional nia planu mak atu hamenus pobereza husi totál 41.8 pursentu no hakarak tuun ba iha ba 10% durante tinan lima nia laran mai ne’e. Tamba ida ne’e ho peskiza ne’e sai hanesan sasukat ba governasaun hodi haree no hala’o planu hodi atinji objetivus.

Excelencia Ministra das Finansas husu ba partesipante sira atu partesipa iha treinamentu ida ne’e ho maximu tamba formadores mesak timor-oan de’it, tamba ne’e bainhira la komprende durante ne’e kedas bele husu hodi sira fó esplikasaun ida ne’ebé kle’an.

Prezidente INETL, I.P., Elias dos Santos Ferreira, informa liu tan katak, peskiza ba kiak ne’e loloos halo kada tinan lima-lima maibé tanba ita nia nasaun altura ne’eba hasoru hela surtu COVID-19 no iha mos sensu agrícola iha tinan 2019, hodi nune’e mak muda fali ba tinan 2024.

“Peskiza kiak ne’e importante hodi nune’e ita bele hatene no kompara fali ho dadus sira ulu-uluk nian. Tanba dala barak ema ko’alia tuir sira-nia haree katak kiak ne’e aumenta, ida-ne’e dadus Ita foti husi sé, atu hatene dadus kiak aumenta maka tenke liuhusi peskiza ida,” Sr. Elias salienta.

Tanba ne’e maka ekipa sira ne’ebé atu tun ba kampu ka field persiza formasaun atu bele apar no entende didiak liu-tan pergunta sira. Peskiza kiak ka pobereza ne’e foka ba áreas sira hanesan uma-kain, edukasaun, agrikultura, sosiál no kapitál.

“Pontu importante tolu hodi sukat kiak hanesan kilo kalori katak, ema ida tenki han kilo kalori 2.100, asesu ba uma diak oituan, dala ruma ema dehan nia iha karau barak oinsá mak dehan fali nia kiak? Resposta mak ne’e, nia bele iha animál barak maibé nia han la to’o kilo kalori 2.100 maka nia tama kategoria kiak,” nia haktuir.

INETL, I.P desde tinan 2016 bainhira halo peskiza la utiliza ona surat-tahan (paper), signifika uza CAPI Android bainhira rekolla dadus hotu mak manda direita kedas ba nasionál hodi bele tais didi’ak dadus sira molok prodús relatóriu hodi submete ba Governu.

Peskizadór sira hamutuk 80, kompostu husi entrevistaór no supervisor no motorista na’in-20. Ekipa sira ne’e sei coverture iha territóriu Timor-Leste, ekipa sira ne’e kompostu husi entrevistadór tolu, supervisor ida no motorista ida.

“Durante fulan-tolu nia laran bele kobre ona 50% territóriu Timór, ne’e ita bele fó ona relatóriu prelimináriu. Ekipamentu sira mak dasi para tetu todan, metro hodi sukat hodi hatene nutrisaun. Kompila dadus ho tableta hamutuk 3.500, ne’ebé utiliza nafatin fasilidade ne’e hodi rekolla dadus,” Presidente INETL, I.P haklaken.

Iha tempu hanesan, Representante Banku Mundiál iha Timor-Leste, Sr. Bernard Harborne ho laran kontenti atu serbisu hamutuk ho governu Timor-Leste liu husi INETL, I.P., atu produz relatóriu peskiza Sasukat Padraun moris ne’e, tamba depois tinan 10 ladauk iha relatóriu foun ruma kona-bá neé.

Orsamentu ne’ebé sei gasta ba atividade mai husi orsamentu Jerál Estadu hamutuk millaun $1, kompostu husi selu pesoál sira no aluga kareta. Enkuantu, Banku Mundiál fó asisténsia tékniku katak halo analiza dadus sira ne’ebé timor-oan sira rekolla. Partesipante ba iha eventu lansamentu peskiza sasukat padraun moris Timor-Leste 2024 ba-dahaát ida ne’e atende husi; Gestores Ministério das Finansas, Banku Mundiál Timor-Leste, Banku Mundial delegasaun sira husi Jakarta no Washintong DC no media sira.