Presidente INETL Interina Abertura Treinamentu ba Peskiza Atividade Emprezarial tinan 2024

Díli, 04 Marsu 2024 (INETL)–Presidente Interina INETL, I.P., Sra. Maria do Carmo Moreira hamutuk ho Diretor Estatística de Ekonómia, Sr. Cristino Gusmão no mós gestores dentro INETL hahú loke abertura treinamentu ba Peskiza Atividade Emprezarial (PAE) ba tinan 2024. Treinamentu PAE hahú iha loron 04 – 09 fulan Marsu 2024. Iha dia 11 de Marsu staff sira sei desloka ona ba munisipios 14 hodi hala’o kolleksaun de dadus.

Iha seremonia abertura ba treinamentu nian, diretór Sr. Cristino Gusmão relata relatoriu badak ba iha Sra. Presidente Interina INETL, I.P., no partesipante sira katak, Peskiza Atividade Emprezarial ida ne’e ho objetivus mak hanesan: 1). Peskiza atividade emprezarial ida ne’e sei fornese sasukat save ba realizasaun industria Timor-Leste., 2). Informasaun ka Dadus hirak ne’e sei uza ba kompilasaun Kontas Nasionais (national account).

Staff sira ne’ebé sei serbisu iha Peskiza Atividade Emprezarial ne’e mak hamutuk 54 kompostu husi; Enumeradores nain 36, Supervizor nain 9 no Motorista nain 9. Staff kasual nain lima-nulu resin haat ne’e sei fahe ba ekipa 9, ekipa ida hamutuk ema nain 6 inklui motorista no kada ekipa ida sei serbisu iha Munisipio 2, Sr. Diretor Gusmão salienta.

Sr. Gusmão informa katak, durante Peskiza Atividade Emprezarial ne’e sei dura ba fulan rua (2) hahu husi loron 11 fulan Marsu to’o fali loron 11 fulan Maio 2024. Iha peskiza ida ne’e sei la uza ona kestionariu iha formatu surat tahan, maibé sei uza aparelu elektroniko ho naran Android ka CAPI (Computer-Assisted Personal Interviewing) ho hala’o entrevista ba respondente sira. Entrevista uza aparelu ne’e efetivu no efikas tebe-tebes tanba entrevista hotu wainhira linha internet iha manda direita mai kedas nasional hodi halo verifikasaun, katak entrevistador ne’e halo nia serbisu tuir duni padraun ne’ebé fó ou lae, karik la’e, gestores sira sei tu’un ba terrenu hodi halo loos kedas iha fatin refere.

Iha eventu ne’e Presidente Interina Instituto Nacional de Estatística de Timor-Leste-(INETL), Sr. Maria do Carmo Moreira sumariza relatóriu badak husi Sr. Diretór Cristino Gusmão katak, Peskiza Atividade Emprezarial ne’e hanesan atividade ida ne’ebé hamahan-aan iha INETL, I.P., nia okos no atividade ida ne’e importante tebe-tebes, tanba sai hanesan sasukat ba ita-nia Produtu Internu Bruto,iha ne’e ita hotu-hotu hatene katak, husi peskiza ida ne’e mak ita bele hatene klean liu kona-ba kresimentu ekonómia no husi parte seitor privadu sira mós fó kontribuisaun maka’as ba mós kresimentu ekonomia nasaun Timor-Leste.

Sra. Moreira esplika ba partesipante sira katak, Peskiza Atividade Emprezarial ne’e importante tebe-tebes, ne’e duni INETL, I.P., tau fiar ba ita boot sira liu husi dadus ne’ebé ita boot sira sei rekoilla tanba ida ne’e fó kontribui boot ida ba ita-nia Produtu Internu Bruto no bain-bain ita hanaran GDP (growth domestic product) tanba setor privadu nia kontribuisaun ne’e mak sai hanesan pontus boot ida atu kontribui ba GDP ne’e rasik.

Sra. Moreira emfaze liu tan katak, durante treinamentu semana ida nia laran, husu ba partesipante sira atu atende ho kompletu no buka komprende halo didiak, karik durante treinamentu la komprende husu ba treinador sira hanesan Sra. Nani Rolanda, Sr. Eduardo Martinho Ximenes no treinadores sira seluk hodi bele buka maneira oinsa esplika ba ita boot sira bele entende ho didiak molok tun ba iha terrenu. Se’e ita boot sira sente mós hanesan nain no mós hetan fiar husi INETL ba iha Peskiza ne’e, entaun INETL sei hetan output ne’ebé diak husi ita boot sira nia serbisu, aumenta husi Sra. Presidente interina.