Ministériu Finansas liu husi INTL,I.P, Hamutuk ho Ministériu da Saúde Ensera Formasaun ba Enumeradores no Supervizores ba Peskiza Demografia no Saúde 2025.

Díli, 26/09/2025 – Ministériu Finansas Liuhosi Institutu Nasionál Estatístika Timor-Leste, Institutu Públiku, hamutuk ho Ministériu Saúde, UNFPA no ICF Macro International hala’o enseramentu ba formasaun enumeradores, biomarkers no supervisores ba Peskiza Demografia no Saúde Timor-Leste 2025 ne’ebé hala’o durante semana ha’at nia laran molok tu’un ba terrenu.

Peskiza ida ne’e importante tebes-tebes atu hetan rezultadu foun kona-ba fertilidade, mortalidade, nutrisaun, planeamentu famíliar nomós povu nia asesu ba fasilidade saúde. Ho esperasa katak wainhira remata peskiza iha meadus tinan 2026 bele iha ona rezultadu summáriu atu governu bele uza hodi halo planeamentu ida ne’ebé di’ak ba Saúde Povo Timor-Leste nia diak ba iha futuru.

Iha okaziaun ne’e prezidente Institutu Nasionál Estatístika Timor-Leste, Institutu Públiku, haktuir katak “ohin enseramentu ba formasaun ne’ebé hala’o kedas ona durante semana ha’at iha fulan Agostu kona-ba treinamentu ba treinadór (TOT), nomós iha loron 2-25 Setembru hala’o treinamentu ba enumeradores hamutuk ema nain 76 husi ema hitu nulu-resin neen ne’e enumeradores mane mak 24 no feto mak 48, supervizór hamutuk ema 24, biomarkers hamutuk ema nain 29 mai husi funsionáriu Ministériu da Saúde no motorista hamutuk ema nain 24. Iha ekipa ida husi peskiza ne’e sei koloka enumeradór feto 2 no enumeradór mane 1, supervizór 1, biomarker 1 no motorista 1. Total ekipa hamutuk 24 maka sei halo serbisu rekoilla dadus iha 14 Munisípios no Sira sei ba vizita uma-kain amostra hamutuk 12.880 iha teritoriu Timor-Leste.” Ekipa ne’e sei ativo hala’o knar hirak ne’e durante fulan tolu nia laran.

Peskiza ne’e uza kuestionariu lima maka hanesan uma-kain, mane, feto, tetu labarik no hasai raan hodi teste ba anemia nian. Peskiza sei hahú iha 23 Setembru no sei remata iha 23 Dezembru tinan ida ne’e. Peskiza Demografia no Saúde Timor-Leste 2025 ne’e halo ona ba da-tolu, primeiru iha 2010, segundu iha 2016.

Osamentu ba iha peskiza ida ne’e 65 pursentu mai husi governu rasik, no hetan apoiu husi parseiru dezenvolvimentu sira hanesan UNFPA, DFAT, Banku Mundiál, UNICEF, WFP, no assistensia tékniku husi ICF-Macro Internasionál.

Atividade enseramentu ne’e hala’o iha auditorium Ministériu Finansas Aitarak-Laran Díli, Timor-Leste

Serémonia enseramentu formasaun ne’e partisipa husi; Diretores funsionário sira husi Ministériu da Saúde no INETL, I.P., Komisariu Autoridade Audoneiro, DG Servisos Coorporativos Ministériu das Finansas, World Food Program, UNFPA, ICF Macro Internasionál no media.