EU-ONU Hamutuk ho INETL, I.P. Hala’o Semináriu Konsultasaun Rejionál Kona-bá Formasaun Literasia Dadus nian, iha Otél Timor

Dili, 07-06-2023 – Instituto Nasionál Estatístika Timor-Leste, Institutu Públiku (INETL, I.P) hamutuk ho UNFPA liu husi projetu Inisiativa Spotlight EU-ONU nian ohin hala’o semináriu konsultasaun rejionál ida kona-bá formasaun literasia dadus nia, partesipantes ne’ebé atende iha seminário ne’e kompostu husi munisípius lima maka hanesan; Aileu, Ainaro, Covalima, Liquiça no Manufahi alende ne’e mós atende husi Polisia Nasional Timor-Leste ne’ebé serbisu halai liu ba iha kazu criminal nian. Semináriu ida ne’e loke husi Presidente Autoridade Munisípiu de Dili Sra. Guilhermina Filomena Saldanha Ribeiro hamutuk ho Presidente Instituto Nasionál Estatístika Timor-Leste, Sr. Elias dos Santos Ferreira, Representante husi Sekretaria Estadu ba Igualdade no Inkluzaun (SEII), Sr. Armando da Costa, no UNFPA nia representante iha Timor-Leste, Sra. Pressia Arifin-Cabo. Eventu referre hala’o iha Otél Timor, iha Dili.

Representante UNFPA iha Timor-Leste, Sra. Pressia hato’o obrigado wain ba Diresaun Jerál de Estatístika-(DGE) iha altura ne’ebá serbisu hamutuk iha hala’o no hatudu kooperasaun ne’ebé diak liu ho UNFPA iha implementasaun sensu daha’at no Peskiza Saúde Demografia ka DHS hodi ikus mai ita bele hatene diak kona-bá dadus ho informasaun loloos bá mortalidade no fertilidade iha nasaun ida ne’e. Sra. Pressia mós sublina katak UNFPA sei mantein nafatin serbisu diak ho INETL ne’ebé foin hamrik atu bele diak liu-tan iha futuru. UNFPA ho INETL sei nafatin fornese kapasitasaun ba staff governu ho ONG sira ne’ebé serbisu kona-bá hatama dadus, prosesa dadus, analiza dadus no interpreta dadus sobre violência bazeandu ba jeneru tuir dadus peskiza sira husi dadus administrativo nian.

Iha tempu hanesan Presidente Autoridade Munisípiu de Dili Sra. Guilhermina Filomena Saldanha Ribeiro, Presidente INETL, Sr. Elias dos Santos Ferreira, representante husi SEII, Sr. Armando da Costa no Sra. Pressia Arifin-Cabo, reprezentate UNFPA iha Timor-Leste fó sai informasaun hanesan katak dadus kona-bá Violénsia Bazeia bá Jéneru fornese evidénsia kona-bá magnitude hosi problema ne’ebé kontinua hanesan direitus umanus no kestaun saúde públika ne’ebé universal liu iha Timor-Leste. “Se la-iha dadus, ita sei la hatene eskala impaktu husi violénsia bá feto no mane sira nia moris iha ita nia nasaun”. Partisipante ne’ebé atende iha semináriu referre hamutuk 100 resin mai husi munisípiu sira, reprezentante husi organizasaun non-governamentál no liña ministeriál sira